Na mañá deste venres o porto de Laxe acolleu un simulacro marítimo para mostrar o funcionamento e coordinación de medios do Plan Territorial de Continxencias por Contaminación Mariña Accidental de Galicia (Plan CAMGAL), un instrumento que permite á Xunta de Galicia poñer en marcha un protocolo de actuación ante hipotéticos episodios de contaminación mariña accidental.
Ao acto acudiron o vicepresidente segundo e conselleiro de Presidencia, Xustiza e Deportes, Diego Calvo, e a conselleira do Mar, Rosa Quintana; quen foron recibidos polo alcalde de Laxe, José Luis Pérez Añón.
O público asistente puido coñecer os procesos e mecanismos dos que dispoñemos en Galicia para intentar que, no caso de que se produza un accidente marítimo, se poida actuar con máis rapidez e eficiencia de cara a evitar graves problemas ambientais nas costas galegas. En concreto, no exercicio de hoxe traballouse cunha hipotética colisión dun pesqueiro cun buque químico que se dirixía á Coruña, a 15 millas da vila de Laxe, e tras a cal se producía unha perda de combustible.
No porto de Laxe dispuxéronse diversos elementos de actuación como barreiras de arrastre para a limpeza do hidrocarburo flotante así como de contención para desviar unha posible mancha de carburante e evitar, deste xeito, unha posible entrada na zona portuaria.
Tamén se mostrou como se activaría a colaboración coa Axencia Galega de Emerxencias para facilitar os traballos de coordinación e o modo no que se usarían os medios aéreos tecnolóxicos, como os drons, para facer un seguimento do suceso dende o aire.
Desde o Concello agradecen que a Xunta de Galicia e a Consellería do Mar elixiran Laxe para este simulacro xa que “somos un pobo mariñeiro e, como tal, podemos correr o risco de sufrir un accidente de contaminación polo que cremos necesario saber como actuar pero, sobre todo, coñecer de que medios dispoñemo, a nivel local e autonómico, para evitar catástrofes ambientais”.
<< | < | Novembro de 2020 | > | >> | ||
---|---|---|---|---|---|---|
L | Ma | Mé | X | V | S | D |
1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 |