07/05/2024 Laxe contará un ano máis cunha Bandeira Azul na súa praia urbana

O Concello de Laxe contará un ano máis co distintivo de Bandeira Azul na súa praia urbana.  

Este distintivo, que goza de carácter internacional, corre a cargo da Asociación de educación ambiental e do consumidor (Adeac), que recoñece anualmente a areais de todo o mundo a partir de criterios de sustentabilidade, accesibilidade e servizos.  

Neste caso, a Praia de Laxe goza de todos os servizos propios dunha praia urbana de alta calidade, permitindo que os usuarios e usuarias poidan gozar de todas as comodidades posibles durante a súa estancia.  

Cabe subliñar que o municipio conta con outros tres areais como Soesto, Arnado e Traba, que gozan dunha localización única, ideais para realizar deportes acuáticos ou descansar tranquilamente.  

Desde o Concello de Laxe amosan o seu “orgullo por volver a conseguir este distintivo, que conta cunha gran relevancia a nivel turístico” e sinalan que “cada ano milleiros de visitantes achéganse ata as nosas praias para desfrutar do gran paraíso natural do que dispoñemos”.  

Desde o Consistorio subliñan a gran calidade dos seus areais “nos que se traballa a reo durante todo o verán para mantelos en perfectas condicións para o seu mantemento e que tanto veciñanza como visitantes poidan gozar deles”.