O Concello de Laxe prepárase para darlle a benvida ao “mes de amor” coa posta en marcha da quinta edición do seu concurso ‘Dillo ben bonito. O amor prémiase en Laxe’. A iniciativa, impulsada desde a Concellería de Comercio, Hostalaría, Turismo e Cultura, ten o obxectivo de promover a creación literaria a través de dedicatorias de amor.
No certame poderán participar todas as persoas maiores de idade que así o desexen, con independencia de se residen ou non no municipio laxense. Aceptarase unha única proposta por persoa e, de presentarse máis, aceptaríase unicamente a primeira. Deberán versar sobre o amor en parella, ben sexa real ou platónico.
A dedicatoria deberá estar en formato A4 e conter entre 30 e 300 palabras. Ademais, deberá ter un título antes do texto da dedicatoria e estar asinada cun pseudónimo, escollido libremente pola persoa participante, ao final do mesmo.
O contido da peza, que pode ser escrito en formato prosa ou verso, deberá ser inédito e orixinal. Non se aceptarán traballos que xa foran presentados en edicións anteriores nin aqueles que teñan algún compromiso de publicación cunha editorial e/ou similar.
O prazo para participar nesta V edición do concurso comezará desde o día seguinte á publicación das bases no Boletín Oficial da Provincia e rematará o vindeiro 8 de febreiro ás 11:00 horas.
As candidaturas poderanse presentar a través de tres modalidades: telemática (a través da sede electrónica municipal), por correo postal ou de xeito presencial no Rexistro Xeral da Casa do Concello, en horario de 9:00 a 14:00 horas.
Votacións e resolución do certame
O xurado estará conformado pola veciñanza, que poderá votar polas súas dedicatorias favoritas a través da páxina de Facebook do Concello de Laxe ou do servizo de mensaxería instantánea NovasLaxe.
O venres 9 de febreiro publicaranse todas as dedicatorias que reúnan os requisitos no Facebook municipal. O proceso de votación comezará nese mesmo intre e darase por concluído o día 16 de febreiro ás 11:00 horas. Nese momento procederase á recompilación dos votos.
O día 19 de febreiro daranse a coñecer os gañadores desta edición, que recibirán como premio unha noite de aloxamento e almorzo para dúas persoas nos seguintes establecementos: Cabanas Narea, Hotel O Náutico, Islow Coliving, Hotel Rústico e apartamentos turísticos A Torre de Laxe, Casa Rural O Arrueiro, Hotel Playa de Laxe, Apartamentos turísticos Os Batáns, Hotel Mar de Laxe e Hospedaxe-Residencia Bahía.
O premio poderase desfrutar no aloxamento correspondente desde a súa data de concesión ata o 31 de outubro de 2024.
<< | < | Maio de 2024 | > | >> | ||
---|---|---|---|---|---|---|
L | Ma | Mé | X | V | S | D |
1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 |